ಪ್ರತಿ ವ್ಯಕ್ತಿ ಹಾಗೂ ಪ್ರತಿ ಕುಟುಂಬವು ಉತ್ತಮ ಆರೋಗ್ಯದ ಹಕ್ಕನ್ನು ಹೊಂದಿದೆ ಎಂದು ನಾವು ನಂಬಿದ್ದೇವೆ
ಒಂದು ಸಮಗ್ರ ಮತ್ತು ಸಹಯೋಗದ ಮಾರ್ಗದಿಂದ, ನಾವು ಸಮುದಾಯದ ಆರೋಗ್ಯ ಆಚರಣೆಗಳನ್ನು ಸುಧಾರಿಸುತ್ತೇವೆ ಮತ್ತು ಸಾಮಾಜಿಕವಾಗಿ ಮತ್ತು ಆರ್ಥಿಕವಾಗಿ ದುರ್ಬಲವಾಗಿರುವ ಕುಟುಂಬಗಳಿಗೆ ಉತ್ತಮ ಗುಣಮಟ್ಟದ ಆರೋಗ್ಯ ಸೇವೆಗಳು ಸುಲಭವಾಗಿ ದೊರಕುವಂತೆ ಮಾಡುತ್ತೇವೆ.
ಆರೋಗ್ಯ ಒಂದು ಸಾರ್ವಜನಿಕ ಒಳಿತು. ಆರೋಗ್ಯ ಸೇವೆಗಳು ನಮ್ಮ ದೇಶದ ಪ್ರತಿ ಮೂಲೆ ಮೂಲೆಗೂ ತಲುಪಲು ಒಂದು ಸದೃಢ ಸಾರ್ವಜನಿಕ ವ್ಯವಸ್ಥೆಯ ಅಗತ್ಯವಿದೆ ಎಂದು ನಾವು ನಂಬಿದ್ದೇವೆ. ಸಮುದಾಯ ಆರೋಗ್ಯ, ಪ್ರಾಥಮಿಕ ಆರೋಗ್ಯ ಸೇವೆ, ದ್ವಿತೀಯ ಆಸ್ಪತ್ರೆಗಳು – ಹೀಗೆ ಸಾರ್ವಜನಿಕ ವ್ಯವಸ್ಥೆಯ ಎಲ್ಲ ಹಂತಗಳ ಸಾಮರ್ಥ್ಯ ಮತ್ತು ಕಾರ್ಯನಿರ್ವಹಣೆಯಲ್ಲಿ ಸುಧಾರಣೆಯನ್ನು ತರುವುದರ ಮೂಲಕ ವ್ಯವಸ್ಥೆಯನ್ನು ಬೆಂಬಲಿಸುವುದು ನಮ್ಮ ಮುಖ್ಯವಾದ ಕೆಲಸ. 2022ರಲ್ಲಿ ಪ್ರಾರಂಭಗೊಂಡ ಆರೋಗ್ಯ ಕ್ಷೇತ್ರದಲ್ಲಿನ ನಮ್ಮ ಕೆಲಸವು ಬಹಳ ವೇಗವಾಗಿ ವಿಸ್ತಾರಗೊಳ್ಳುತ್ತಿವೆ. ಈ ಕ್ಷೇತ್ರದಲ್ಲಿ ನಮ್ಮ ಮಾರ್ಗದರ್ಶಿ ತತ್ತ್ವಗಳು ಕೆಳಗಿನಂತಿವೆ:
- ವ್ಯಕ್ತಿಗಳು ಮತ್ತು ಕುಟುಂಬಗಳು ಆರೋಗ್ಯವಾಗಿ ಬದುಕಲು ನೆರವಾಗುವುದೇ ನಮ್ಮ ಗುರಿ; ನಮ್ಮ ಗುರಿಯು ಆರೋಗ್ಯ ಸೇವೆಗಳು ಲಭ್ಯವಾಗುವಂತೆ ಮಾಡುವುದಕ್ಕೆ ಮಾತ್ರ ಸೀಮಿತವಾಗಿಲ್ಲ
- ಇದಕ್ಕೆ ಪ್ರಾಥಮಿಕ ಮತ್ತು ದ್ವಿತೀಯ ಹಂತದ ಆರೋಗ್ಯ ಸೇವೆಗಳಿಂದ ಬೆಂಬಲಿತವಾಗಿರುವಂತಹ, ಒಂದು ಸದೃಢ ಮುಂಚೂಣಿ ಸಮುದಾಯ ಆರೋಗ್ಯ ವ್ಯವಸ್ಥೆಯೊಂದರ ಅಗತ್ಯವಿದೆ.
- ಈ ಉದ್ದೇಶವನ್ನು ಒಂದು ಪರಿಣಾಮಕಾರಿ ಸಾರ್ವಜನಿಕ ಆರೋಗ್ಯ ವ್ಯವಸ್ಥೆ ಮಾತ್ರ, ಜನರಿಗೆ ಕೈಗೆಟುಕುವ ಮತ್ತು ದಶಕಗಳ ಕಾಲ ಸುಸ್ಥಿರವಾಗಿರಬಲ್ಲ ರೀತಿಯಲ್ಲಿ ದೇಶದ ಮೂಲೆ ಮೂಲೆಗೂ ಹರಡುವ ಮೂಲಕ, ಸಾಧಿಸಬಹುದು.
ಆರೋಗ್ಯ ಕ್ಷೇತ್ರದಲ್ಲಿ ನಾವು ನಮ್ಮ ಕ್ಷೇತ್ರ ಸಂಸ್ಥೆಗಳ ಮೂಲಕ ನೇರವಾಗಿ ತಳಸ್ತರದಲ್ಲಿ ಕೆಲಸ ಮಾಡುತ್ತೇವೆ. ಸಹಯೋಗವು ನಮ್ಮ ಕೆಲಸಗಳ ಪ್ರಮುಖ ಅಂಶವಾದ್ದರಿಂದ, ತಲುಪಲು ಕಷ್ಟಸಾಧ್ಯವಾದ ಪ್ರದೇಶಗಳಲ್ಲಿ ಕೆಲಸ ಮಾಡುವ ಆರೋಗ್ಯ ಸಂಸ್ಥೆಗಳೊಂದಿಗೆ ಕೈಜೋಡಿಸುವುದಲ್ಲದೆ, ಅವುಗಳಿಗೆ ಅನುದಾನದ ರೂಪದಲ್ಲಿ ನೆರವು ನೀಡುತ್ತೇವೆ.
ತಳಸ್ತರದ ಕೆಲಸ ಮಾತ್ರವಲ್ಲದೆ, ಶಿಕ್ಷಣದ ಮೂಲಕ ನಾವು ಮಾಹಿತಿಯುಕ್ತ, ನಿಪುಣ ಮತ್ತು ಸಮರ್ಪಣಾ ಭಾವದ ಆರೋಗ್ಯ ವಲಯ ಕಾರ್ಯಪಡೆಯನ್ನು ರೂಪಿಸಲು ನೆರವನ್ನು ಒದಗಿಸುತ್ತೇವೆ. ಈ ಕ್ಷೇತ್ರದಲ್ಲಿ ನಾವು ನಡೆಸುವ ಕ್ಷೇತ್ರ ಅಧ್ಯಯನಗಳು ಮತ್ತು ಸಂಶೋಧನಾ ಅನುದಾನಗಳು ತಳಸ್ತರದ ಪ್ರಾಯೋಗಿಕ ವಿಚಾರಗಳ ಮೇಲೆ ಗಮನ ಹರಿಸುತ್ತವೆ.
ಪ್ರಸ್ತುತ ಆರೋಗ್ಯ ಕ್ಷೇತ್ರದಲ್ಲಿನ ನಮ್ಮ ಕೆಲಸಗಳನ್ನು ಸ್ಥೂಲವಾಗಿ ಈ ಕೆಳಗಿನಂತೆ ವರ್ಗೀಕರಿಸಬಹುದು:
ಅಜೀಂ ಪ್ರೇಮ್‌ಜಿ ಹೆಲ್ತ್‌ ಈಕ್ವಿಟಿ ಫೆಲೊಷಿಪ್‌
ಫೆಲೊಗಳು ಹಲವು ರೀತಿಯ ರೋಗಿಗಳಿಗೆ ಚಿಕಿತ್ಸೆ ನೀಡುವ ಆಸ್ಪತ್ರೆಗಳಲ್ಲಿ, ಹಿರಿಯ ಮತ್ತು ಅನುಭವೀ ವೈದ್ಯರ ಮತ್ತು ಅವರ ತಂಡಗಳ ಮಾರ್ಗದರ್ಶನದಲ್ಲಿ ಕೆಲಸ ಮಾಡುತ್ತಾರೆ. ಈ ಕಾರ್ಯಕ್ರಮವು ಅವರಿಗೆ ಸಂಪನ್ಮೂಲಗಳ ಕೊರತೆಯಿರುವ ಸ್ಥಳಗಳಲ್ಲಿ ಪರಿಣಾಮಕಾರಿಯಾಗಿ ಕೆಲಸ ಮಾಡುವುದರ ನೇರ ಅನುಭವವನ್ನು ನೀಡುತ್ತದೆ.
ಅಜೀಂ ಪ್ರೇಮ್‌ಜಿ ಹೆಲ್ತ್‌ ಈಕ್ವಿಟಿ ಫೆಲೊಷಿಪ್‌, ವೈದ್ಯಕೀಯ ಕ್ಷೇತ್ರದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುವ ವೈದ್ಯರಿಗಾಗಿ ಇರುವ ಒಂದು ಸಂಪೂರ್ಣ ಅನುದಾನಿತ ಕಾರ್ಯಕ್ರಮ. ಇದು ಫೆಲೊಗಳಿಗೆ ಭಾರತದ ಗ್ರಾಮೀಣ ಪ್ರದೇಶಗಳಲ್ಲಿರುವ ಪ್ರತಿಷ್ಠಿತ ಆಸ್ಪತ್ರೆಗಳಲ್ಲಿ ಕೆಲಸ ಮಾಡುವ ಅನನ್ಯ ಅವಕಾಶವನ್ನು ಒದಗಿಸುತ್ತದೆ.
ಶಿಶುವಿಹಾರ ಉಪಕ್ರಮ
ಅಜೀಂ ಪ್ರೇಮ್‌ಜಿ ಫೌಂಡೇಷನ್‌ನ ಶಿಶುವಿಹಾರ ಉಪಕ್ರಮವು, ಏಳು ತಿಂಗಳಿನಿಂದ ಮೂರು ವರ್ಷ ವಯಸ್ಸಿನ ಅಂತರದಲ್ಲಿರುವ, ಅತ್ಯಂತ ದುರ್ಬಲ ಮಕ್ಕಳ ಪೌಷ್ಟಿಕ ಸ್ಥಿತಿಗತಿಯಲ್ಲಿ ಸುಧಾರಣೆಯನ್ನು ತರುವ ಉದ್ದೇಶವನ್ನು ಹೊಂದಿದೆ. ಸದ್ಯಕ್ಕೆ, ಬಿಹಾರ, ಛತ್ತೀಸ್‌ಗಢ, ಜಾರ್ಖಂಡ್‌ ಮತ್ತು ಒಡಿಶಾ – ಈ ನಾಲ್ಕು ರಾಜ್ಯಗಳಲ್ಲಿ ಇಂತಹ 667 ಶಿಶುವಿಹಾರಗಳು ನಡೆಯುತ್ತಿವೆ. ಈ ಶಿಶುವಿಹಾರಗಳಲ್ಲಿ ಒಟ್ಟು 9,000ಕ್ಕಿಂತಲೂ ಹೆಚ್ಚಿನ ಮಕ್ಕಳು ದಾಖಲಾಗಿದ್ದಾರೆ.
ಆರೋಗ್ಯ ಅನುದಾನಗಳು
ಆರೋಗ್ಯ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿರುವ ಸಂಸ್ಥೆಗಳಿಗೆ, ತಲುಪಲು ಅತ್ಯಂತ ದುಸ್ತರವಾದ ಪ್ರದೇಶಗಳಲ್ಲಿ ಅವರು ಮಾಡುತ್ತಿರುವ ಕೆಲಸಕ್ಕೆ ನೆರವಾಗುವ ಅನುದಾನಗಳನ್ನು ನೀಡುವ ಮೂಲಕ ನಾವು ಅವರ ಸಹವರ್ತಿಗಳಾಗುತ್ತೇವೆ. ಸಮುದಾಯ ಆರೋಗ್ಯ, ಪ್ರಾಥಮಿಕ ಆರೋಗ್ಯ ಸೇವೆ, ಮತ್ತು ದ್ವಿತೀಯ ಆಸ್ಪತ್ರೆಗಳ ಸಾಮರ್ಥ್ಯ ಮತ್ತು ಕಾರ್ಯನಿರ್ವಹಣೆಯಲ್ಲಿ ಸುಧಾರಣೆಯನ್ನು ತರುವ ಮೂಲಕ ಸಾರ್ವಜನಿಕ ವ್ಯವಸ್ಥೆಯನ್ನು ಎಲ್ಲ ಹಂತಗಳಲ್ಲೂ ಬೆಂಬಲಿಸುತ್ತೇವೆ.
ಆರೋಗ್ಯ ಕ್ಷೇತ್ರದಲ್ಲಿನ ನಿಮ್ಮ ಕೆಲಸಗಳಿಗೆ ಅನುದಾನಕ್ಕಾಗಿ ಅರ್ಜಿ ಸಲ್ಲಿಸಲು ಇಲ್ಲಿ ಕ್ಲಿಕ್‌ ಮಾಡಿ.
ಅಕ್ಟೋಬರ್‌ 2024ರಲ್ಲಿ, ಮೌಲ್ಯಾಧಾರಿತ ಆರೋಗ್ಯ ಆರೈಕೆ ಮತ್ತು ವೈದ್ಯಕೀಯ ಶಿಕ್ಷಣ ನೀಡಲು – ಮುಖ್ಯವಾಗಿ ಅವಕಾಶವಂಚಿತ ವರ್ಗಗಳಿಗೆ ಸೇರಿದ ವಿದ್ಯಾರ್ಥಿಗಳಿಗೆ – ಅಜೀಂ ಪ್ರೇಮ್‌ಜಿ ಫೌಂಡೇಷನ್‌ ಕ್ರಿಶ್ಚಿಯನ್‌ ಮೆಡಿಕಲ್‌ ಕಾಲೇಜು (ಸಿಎಮ್‌ಸಿ) ವೆಲ್ಲೂರು, ಇದರೊಂದಿಗೆ ಸಹಯೋಗವನ್ನು ಘೋಷಿಸಿತು. ಇದರ ಭಾಗವಾಗಿ, ಸಿಎಂಸಿ ವೆಲ್ಲೂರು, ತನ್ನ ಚಿತ್ತೂರಿನ ಕ್ಯಾಂಪಸ್‌ನಲ್ಲಿ ವೈದ್ಯಕೀಯ ಕಾಲೇಜನ್ನು ಸ್ಥಾಪಿಸಲು ಮತ್ತು ಈಗಿರುವ 120 ಹಾಸಿಗೆಗಳ ಆಸ್ಪತ್ರೆಯನ್ನು 422 ಹಾಸಿಗೆಗಳ ವೈದ್ಯಕೀಯ ಶಿಕ್ಷಣ ಆಸ್ಪತ್ರೆಯನ್ನಾಗಿ ವಿಸ್ತರಿಸಲು ಫೌಂಡೇಷನ್‌ ರೂ. 500 ಕೋಟಿ ರೂಪಾಯಿ ಅನುದಾನವನ್ನು ನೀಡಿತು.
ಸಾರ್ವಜನಿಕ ಆರೋಗ್ಯ ಶಿಕ್ಷಣ
ಭಾರತದಲ್ಲಿ ಕೋವಿಡ್‌ – 19 ಪಿಡುಗು ಉಲ್ಬಣಿಸಿದಾಗ ಎದುರಾದ ಗಂಭೀರ ಆರೋಗ್ಯ ಮತ್ತು ಮಾನವೀಯ ಬಿಕ್ಕಟ್ಟಿನ ಸಂದರ್ಭದಲ್ಲಿ, ಆರೋಗ್ಯ ಕ್ಷೇತ್ರದಲ್ಲಿ ವಿಷಯ ಜ್ಞಾನ, ಕೌಶಲ್ಯ ಮತ್ತು ಪರಿಣತಿಯ ಅಗತ್ಯತೆ ಇರುವುದು ಮುನ್ನೆಲೆಗೆ ಬಂತು. ನಾವು ಈಗ ಭೋಪಾಲದಲ್ಲಿರುವ ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯದ ಕ್ಯಾಂಪಸ್‌ನಲ್ಲಿ ಸಾರ್ವಜನಿಕ ಆರೋಗ್ಯ ವಿಷಯದಲ್ಲಿ ಸ್ನಾತಕೋತ್ತರ ಕಾರ್ಯಕ್ರಮವನ್ನು ಪ್ರಾರಂಭಿಸಿದ್ದೇವೆ. ಈ ಕಾರ್ಯಕ್ರಮವನ್ನು ವೈದ್ಯಕೀಯ ವೃತ್ತಿ ಮತ್ತು ಸಾಮರ್ಥ್ಯಗಳ ಮೇಲೆ ಒತ್ತು ಕೊಡುವಂತೆ ವಿನ್ಯಾಸಗೊಳಿಸಲಾಗಿದೆ.
ಸಂಶೋಧನೆ
ನಾವು ಸಾರ್ವಜನಿಕ ಆರೋಗ್ಯಕ್ಕೆ ಸಂಬಂಧಿಸಿದ ವಿಷಯಗಳ ಮೇಲೆ ಸ್ವತಂತ್ರ ಸಂಶೋಧನೆಗಳನ್ನು ಕೈಗೊಳ್ಳುತ್ತೇವೆ ಮತ್ತು ಅಂತಹ ಪ್ರಯತ್ನಗಳಿಗೆ ಹಣಕಾಸು ನೆರವನ್ನು ನೀಡುತ್ತೇವೆ. ಈ ಅಧ್ಯಯನಗಳು ಸೌಲಭ್ಯವಂಚಿತ ಸಮುದಾಯಗಳ ಆರೋಗ್ಯದ ಕುರಿತ ವಾಸ್ತವಾಂಶಗಳ ಅರಿವನ್ನು ಹೆಚ್ಚಿಸಲು ಪ್ರಯತ್ನಿಸುತ್ತವೆ. ನಮ್ಮ ಕ್ಷೇತ್ರಕಾರ್ಯದ ಅವಿಭಾಜ್ಯ ಅಂಗವಾಗಿ ನಡೆಸುವ ನೇರವಾಗಿ ಅಧ್ಯಯನಗಳ ಜೊತೆಗೆ, ನಾವು ಸಂಶೋಧನಾ ಅನುದಾನಗಳ ಮೂಲಕ ಇತರ ಸಂಸ್ಥೆಗಳಿಗೆ ಬೆಂಬಲ ನೀಡುತ್ತೇವೆ.
ಭಾರತದ ಸಾರ್ವಜನಿಕ ಆರೋಗ್ಯದ ವಾಸ್ತವಗಳನ್ನು ಆಳವಾಗಿ ತಿಳಿಯಲು ಅನುದಾನಗಳು
ತಳಸ್ತರದಲ್ಲಿ ಆರೋಗ್ಯ ಕಾರ್ಯ
ಗ್ರಾಮೀಣ ಆರೋಗ್ಯ ಕಾರ್ಯ
2023ರಲ್ಲಿ ಫೌಂಡೇಷನ್‌ ಛತ್ತೀಸ್‌ಗಢ ಮತ್ತು ಜಾರ್ಖಂಡ್‌ ರಾಜ್ಯಗಳ ಗಡಿ ಭಾಗದ ಸುತ್ತಲಿನ ಹತ್ತು ಜಿಲ್ಲೆಗಳಲ್ಲಿ ತನ್ನ ಕೆಲಸವನ್ನು ಪ್ರಾರಂಭಿಸಿತು. ಸಾರ್ವಜನಿಕ ಆರೋಗ್ಯ ವೃತ್ತಿಪರರ ಒಂದು ತಂಡವು ಸ್ಥಳೀಯ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು (PHCs) ಮತ್ತು ಆರೋಗ್ಯ ಉಪ ಕೇಂದ್ರಗಳಿಗೆ ನೆರವು ನೀಡಲು ಪ್ರಾರಂಭಿಸಿತು. ಈ ತಂಡವು ಆರೋಗ್ಯ ಕೇಂದ್ರಗಳಿಗೆ ʼಗ್ರಾಮ ಆರೋಗ್ಯ, ನೈರ್ಮಲ್ಯ ಮತ್ತು ಪೌಷ್ಟಿಕಾಂಶ ದಿನʼಗಳನ್ನು(Village Health, Sanitation and Nutrition Days) ನಡೆಸುವಲ್ಲಿ ಸಹಾಯ ಮಾಡುವುದು, ಅಲ್ಲಿನ ಸಿಬ್ಬಂದಿಗಳ ಸಾಮರ್ಥ್ಯ ಅಭಿವೃದ್ಧಿ, ಪ್ರಾಥಮಿಕ ಆರೋಗ್ಯ ಕೇಂದ್ರಗಳು ಮತ್ತು ಉಪಕೇಂದ್ರಗಳಲ್ಲಿನ ಸೇವೆಗಳ ಸುಧಾರಣೆ ಮತ್ತು ಆ ಪ್ರದೇಶದಲ್ಲಿ ರೋಗಿಗಳಿಗೆ ಹೆಚ್ಚಿನ ಆರೈಕೆ ಪಡೆಯುವ ಮಾರ್ಗಗಳನ್ನು ತಿಳಿಸಲು ನೆರವಾಗುತ್ತದೆ.
ನಾವು ಈಗ ಛತ್ತೀಸ್‌ಗಢ ರಾಜ್ಯದ ರಾಯ್‌ಗಢ ಜಿಲ್ಲೆಯ ಎರಡು ಬ್ಲಾಕ್‌ಗಳಲ್ಲಿ (ಧರಮ್‌ಜೈಗಢ ಮತ್ತು ಲಾಯ್‌ಲುಂಗಾ) ಮತ್ತು ಜಾರ್ಖಂಡ್‌ನ ರಾಂಚಿ ಜಿಲ್ಲೆಯ ಎರಡು ಬ್ಲಾಕ್‌ಗಳಲ್ಲಿ (ಬೆರೊ ಮತ್ತು ಇಟ್ಕಿ) ಕೆಲಸ ಮಾಡುತ್ತಿದ್ದೇವೆ.
ಮುಂಚೂಣಿ ಆರೋಗ್ಯ ವ್ಯವಸ್ಥೆಯನ್ನು ಸುಧಾರಿಸುವಲ್ಲಿ ನಮ್ಮ ತಂಡವು ಸರ್ಕಾರಕ್ಕೆ ನೀಡುತ್ತಿರುವ ಬೆಂಬಲವನ್ನು ಮುಂದುವರೆಸಲಿದೆ.
ನಗರ ಆರೋಗ್ಯ ಕಾರ್ಯ
ನಗರಗಳಲ್ಲಿ ವಾಸವಿರುವ ಸಮುದಾಯಗಳಿಗೂ ಸಮಗ್ರ ಆರೋಗ್ಯ ಸೇವೆಗಳು ಲಭ್ಯವಾಗುವಂತೆ ಮಾಡುವುದೂ ಕೂಡ ನಮಗೆ ಮುಖ್ಯ. ನಾವು ಈಗ ಬೆಂಗಳೂರಿನಲ್ಲಿ ವಲಸೆ ಕಾರ್ಮಿಕರು ವಾಸವಿರುವ ಐದು ಕ್ಲಸ್ಟರ್‌ಗಳಲ್ಲಿ ಕೆಲಸ ಮಾಡುತ್ತಿದ್ದೇವೆ. ಈ ಮೂಲಕ ನಾವು ಸುಮಾರು 15,000 ಕುಟುಂಬಗಳನ್ನು ತಲುಪುತ್ತಿದ್ದೇವೆ.
ಪ್ರತಿ ಕ್ಲಸ್ಟರ್‌ನಲ್ಲಿ ನಾವು ನೇರವಾಗಿ ಸಮುದಾಯ ಆರೋಗ್ಯದ ಮೇಲೆ ಕೆಲಸ ಮಾಡುತ್ತೇವೆ. ಜೊತೆಗೆ, ವೈದ್ಯರಿರುವ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು, ಪ್ರಯೋಗಾಲಯಗಳು ಹಾಗೂ ಔಷಧಾಲಯಗಳು, ಮತ್ತು ಹೆಚ್ಚಿನ ಆರೈಕೆಗೆ ಮಾರ್ಗದರ್ಶನ ನೀಡುವ ಉದ್ದೇಶದಿಂದ ಸರ್ಕಾರಿ ಆಸ್ಪತ್ರೆಗಳಲ್ಲಿ ನಾವು ಪ್ರಾರಂಭಿಸಿರುವ ಸಹಾಯ ಕೇಂದ್ರಗಳನ್ನು ನಡೆಸುತ್ತಿದ್ದೇವೆ.
ಮಧ್ಯಾಹ್ನದ ಬಿಸಿಯೂಟದಲ್ಲಿ ಪೌಷ್ಟಿಕಾಂಶವನ್ನು ಹೆಚ್ಚಿಸುವುದು
ಆಗಸ್ಟ್‌ 2024ರಲ್ಲಿ, ಕರ್ನಾಟಕದಲ್ಲಿ ಮಧ್ಯಾಹ್ನದ ಬಿಸಿಯೂಟ ಕಾರ್ಯಕ್ರಮಕ್ಕೆ ನೆರವು ನೀಡಲು ಅಜೀಂ ಪ್ರೇಮ್‌ಜಿ ಫೌಂಡೇಷನ್‌, ಕರ್ನಾಟಕ ಸರ್ಕಾರದೊಂದಿಗೆ ಒಂದು ಒಪ್ಪಂದಕ್ಕೆ ಸಹಿ ಹಾಕಿತು. ಕರ್ನಾಟಕದ ಎಲ್ಲ 31 ಜಿಲ್ಲೆಗಳ ಸರ್ಕಾರಿ ಮತ್ತು ಅನುದಾನಿತ ಶಾಲೆಗಳ 1ರಿಂದ 10ನೇ ತರಗತಿಗಳವರೆಗಿನ ವಿದ್ಯಾರ್ಥಿಗಳಿಗೆ ಮೊಟ್ಟೆಗಳನ್ನು ಒದಗಿಸಲು ಫೌಂಡೇಷನ್‌, ಮೂರು ವರ್ಷಗಳ ಕಾಲ ರೂ. 1,500 ಕೋಟಿ ನೆರವು ನೀಡಲು ಒಪ್ಪಿಕೊಂಡಿದೆ. ಈ ಉಪಕ್ರಮದಡಿಯಲ್ಲಿ, ಸುಮಾರು 53 ಲಕ್ಷ ವಿದ್ಯಾರ್ಥಿಗಳಿಗೆ, ವಾರದ ಎಲ್ಲಾ ಆರು ಶಾಲಾ ದಿನಗಳಲ್ಲಿ ಪೌಷ್ಟಿಕ ಆಹಾರವನ್ನು ನೀಡಲಾಗುತ್ತಿದೆ.
